زاوية 《 على ما أعتقد 》 معاش رئيس الوزراء!

زاوية 《 على ما أعتقد 》

بقلم : عدنان الشرهان

قعدت من النوم .. أكلت موزه .. وبعدها طلبت عصير جزر .. وعقبها بشوي طلبت اييبون لي بمكتبي بالبيت قهوة تركية وسط .. وبدأت اقرأ الصحف واسمع الأخبار .. فجأة إطمرت بنات أفكاري على مكتبي وبلشت اتحن علشان أكتب زاويتي الأسبوعية .. وحده من بنات أفكاري مملوحه وذكية أسالتني : بو فارس شرايك بوضع الكويت ؟ قلت لها : بلد جميل ورائع والله يديم الخير والنعمة علينا .. وبالعناد للدكتور السياسي اللي ما يحب جملة " الله لا يغير علينا " قلت : الله يحفظ هالديرة والله لا يغير علينا ويديم نعمة الأمن والأمان ويزيدنا من خيره .. إطمرت وحده من بنات أفكاري تمووون علي وسألتني : ليش في ناس بالكويت ما يشوفون الا السلبيات يا بو فارس ! يعني بذمتك الحين رئيس الوزراء ما يبي الخير والتنمية حق الكويت ؟ قلت لها بدون تردد : أكيد يبي الخير والتنمية والتطور حق ديرتنا والريال قاعد يشتغل مو قاعد في بيته وياخذ معاش !!!! بهاللحظة تعدلت وحده من بنات أفكاري وسألتني : صج صج بو فارس لو يعينونك اليوم رئيس مجلس الوزراء .. شنو راح تسوي !؟ رديت وأنا اتنطع بالقهوة : اول شيء أشوف جم معاش رئيس الوزراء .. يسوى ولا ما يسوى كل هالحنه والرنه علشان أترك تجارتي وحريتي وأجابل هالمسؤولية ! ردت بنت أفكاري وقالت : لا لا صج بوفارس شنو ممكن تسوي ؟ قلت لها : أوكي .. على ما أعتقد راح اسوي الآتي :

أولا : راح أعتكف بمكتبي يوم واحد بس .. أرتب أهدافي واستراتيجيتي بالإدارة وطريقة عملي ..

ثانيا : ما راح أقوم بتعيين أي وزير تقليدي أو سياسي .. راح أعين ناس ما تبي تصير وزراء .. الوزير عندي بالتكليف .. ثالثا : رايح اطلب تنقيح الدستور مباشرة لأنه واضح ضرورة تطويره ليتماشى مع تطور الدنيا !

رابعا : راح أفصل كل قياديين الوزارات والهيئات والشركات الحكومية ممن عينوا سياسيا وليس فنيا !

رابعا : سوف أطلق حملة على الفساد الإداري والمالي وحتى السياسي وأعين عليه رئيس وفريق عمل حاااامض ما يغشمر ..

خامسا : راح اقوم بتخصيص التعليم والتربية والكهرباء والبلدية كخطوة أولى لتخصيص باقي القطاعات .. خامسا : راح افتح تراخيص تأسيس أحزاب مدنية بقيود صارمة لمنع الطائفية والعائلية والقبلية والمذهبية ..

سادسا : راح أطلق قانون يجرم الواسطة والمحسوبية والطائفية والمذهبية وغيرها ..

سابعا .. هوب هوب بو فارس قالتها وحده من بنات أفكاري : يا معود قراراتك هذي مو الحكومة ما تبيها حتى الشعب يرفضها .. يا معود خلنا على حالتنا والله لا أييبك رئيس وزراء.. انتهى

#عدنان_الشرهان