زاوية 《 على ما أعتقد 》 فاشنيستا سياسي

 زاوية 《 على ما أعتقد 》

I think so ..

فاشنيستا سياسي .. قصة قصيرة 

هناك وليس بعيدا .. جزيرة طموحة وعلى ما أعتقد سيطر عليها فكر الممنوع ! شاب قرر يركب الموجة بعد أن فشل بالدراسة !!!! خاض انتخابات الجمعية التعاونية فنجح .. على طول منع بيع السجائر وأوقف ميزانية الترفية وركز على رحلات مكثفة إلى العمره وخص فيها الاهل والاقارب والجيران وجماعتة اللي صوتت له ! وطز في باقي البشر بالمنطقة هههههههه .. سنتين ثلاث رشح للمجلس البلدي .. فجأة إكتسح الدائرة ! فبدأ يحارب كل شيء او مشروع فيه بهجة للجزيرة .. يالله .. انتخابات مجلس الأمة .. شوي والا ناجح والربع شايلينه : مجلسنا توه ينور .. ولدنا لسانه يعور .. مجلسنا توه ينور .. ولدنا لسانه يعور !!!! وبدأت القصة .. قائمة استجوابات جاهزة .. ميزانية ألالعاب النارية بوقه ! مناسبات ثقافية ما يصير .. حفلات الأوبرا مضيعة وقت ! المولات والمقاهي والشيشه حرام .. وانت اللي رايح .. طلع الريال يبي يصير اهوه محور الحدث واهوه الفاشنيستا بحياتنا .. تروح عرس مرتز .. عزاء مرتز .. تفتح الجريدة مرتز .. تبطل التلفزيون مرتز .. تفتح الثلاجة مرتز .. هذا الفاشنيستا السياسي على ما أعتقد وعلى ما يبدو ما يبي اي حدث فرايحي او رياضي او ثقافي يلتهي فيه الناس عنه !!! خلاص : أنا أهم من نجوم المنتخب وأهم من الأعمال الأدبية والثقافية وأهم من المشاريع الترفيهية والفرايحية وأهم من المشاريع العملاقة ! أتركوا كل هالاحداث وتابعوني وتابعوا السياسة ! بالصدفة العجيبة .. شافه شاب في لوبي فندق بدولة عربية يصفق حق رقاصة وفرقة شعبية والكشره من إهنييييه لي هناك ! بكل جرأة سأله الشاب : مرحبا بو فلان .. ها بو فلان الموسيقى والفرحه حلوه صح !؟ رد الفاشنيستا السياسي يساسر الشاب : يا معود إستر على ما وايهت !!!!!؟ انتهى ..

بقلم : عدنان الشرهان

#عدنان_الشرهان