زاوية 《 على ما أعتقد 》 حوار مع غزال فرنسي
《 على ما أعتقد 》زاوية
I think so ..
حوار مع غزال فرنسي ..
 |
| عدنان الشرهان على قناة atv |
راجع من باريس طاير إلى دبي .. ركبت الطيارة رايح باتجاه مقعدي بالإكونومي .. الطيارة زحمة .. وقفت أطالع ركاب الدرجة الأولى وعلى ما أعتقد بعضهم متصالح مع نفسة .. وقاعد مرتاح يتمتع بالخدمة .. أما البعض الآخر فهو مو مصدق على الله إنه كاشخ ومتسمت يخزك بازدراء وطبقية ههههههههه : طالعني شوفني هذي احلى لحظة بالسفرة يا مشرشح يا كادح يا راكب الدرجة السياحية !!!! المهم وصلت وقعدت في أول مقعدين عند "الاقزت" لأني طويل القامة يراعوني عند الحجز .. الحين ناطر حظي .. منو بيقعد يمي !؟ ولييييه شاب خليجي وزنه مليون كيلو يخزني ويخز المقعد اللي يمي : السلام عليكم ( وقعد بدفاشه ) انت كويتي !!!؟ رديت وأنا منبط : نعم .. فورا السؤال الثاني : وين كنت ساكن في باريس !!؟ قلت له : الفندق الفلاني .. السؤال الثالث : حرام عليك غالي بجم ليلته !!؟ وليييييه الحين ورانا أكثر من ست ساعات قاعد يم هالهذره ! شوي ولا غزال فرنسي تتكلم مع المضيفة وتأشر على كرسي جاري الدعله ! قوم هذا مو مكانك .. قلبي قعد يشربك ويصفق ويقول : يا عمي روح الله لا يردك هههههههههه .. قعدت مكانه هالغزال الأشقر والتفتت علي بكل أناقة : بونجور .. أنا فجأة صرت موليير : بونجوووور كوما سافا ههههههه .. البنت ردت : سافا بيا ميغسي .. وتوشحت في لحافها ونامت كالملاك .. لا تشاخر ولا تسعبل وهي نايمة ولا تقولب .. سلامتكم تمثال منحوت بكل إتقان .. قعدت الغزال من النوم وسحبت كرواسوه من الجنطه وبدأ الحوار وقالت : أنا طالبة أدرس تربية وتخصصي جغرافيا .. قلت لها كوني عربي متخلف : أفا .. تدريس لا وجغرافيا بعد ! ليييييش !؟ انا توقعتج فاشن دزاينر ولا عازفة آله موسيقية ولا متخصصة بشيء فيه فن وإبداع ! جاوبت الغزال وهي زعلانه : حرام عليك .. تدري شنو قيمة أنك تكون مدرس !؟ الابداع بدأ بالتعليم والتربية ! للعلم بس التدريس أرقى وأطهر تخصص ووظيفة مو في الدنيا لا في تاريخ البشرية .. للأسف الشعوب والحكومات اللي تنظر لوظيفة التدريس بهذة الطريقة المتخلفة لا تنتظر منها تلد أو تأتي بطفل متطور ! أو جيل متحضر .. أسفه على التعبير بس أول مره أسمع أحد بالدنيا ينظر للمدرس بهالطريقة ! انا والدي فخور جدا بتخصصي ويقول لي دائما : كم أنا فخور بأن عندي بنت مربية أجيال ! يااااه ما بقيت إلا نفسي .. وصلت الطيارة وإحنا نازلين شفت الشاب الخليجي وقال لي وهو يبتسم : خلصت الاجازة ورجعنا حق الزفت الدوام .. قلت له شنو تشتغل ؟ قال : بعد شنو مدرس طيح الله حظي !!!!! انتهى
بقلم : عدنان الشرهان
#عدنان_الشرهان
#ثقافة
